ପରମାଣୁର ବୋମାର ଧମକ ଦେଉଥିବା ପାକିସ୍ତାନ ପିଏମ ସଚିବାଳୟର ବିଜୁଳୀ ବିଲ୍ ଦେବାକୁ ଅସମର୍ଥ

ନୂଆଦିଲ୍ଲୀ: ଅର୍ଥନୈତିକ ଦୁର୍ବଳତାରେ ସନ୍ତୁଳିତ ହେଉଥିବା ପାକିସ୍ତାନ ଜମ୍ମୁ-କାଶ୍ମୀରରୁ ଧାରା ୩୭୦ ଉଚ୍ଛେଦକୁ ନେଇ ପରମାଣୁ ଯୁଦ୍ଧର ଧମକ ଦେଉଛି । ନିଜ ସଚିବାଳୟର ବିଜୁଳୀ ବିଲ୍ ଦେବାକୁ ବି ଅସମର୍ଥ ଥିବା ପାକିସ୍ତାନ ପ୍ରଧାନମନ୍ତ୍ରୀ ଇମରାନ୍ ଖାନ୍ ବାରମ୍ବାର ଭାରତ ଉପରେ ଆକ୍ରମଣ କରିବାକୁ ଧମକ ଦେବାରେ ଲାଗିଛନ୍ତି । ଆର୍ଥିକ କ୍ଷେତ୍ରରେ ଦେବାଳିଆ ହୋଇପଡିଥିବା ପାକିସ୍ତାନର ଅବସ୍ଥା ବହୁତ ଖରାପ ଥିବାରୁ ସଚିବାଳୟର ବିଲ୍ ନଦେଇ ପାରିବାରୁ ବିଜୁଳୀ କାଟିବାର ପରିସ୍ଥିତି ଆସିଯାଇଛି ।

ଏନେଇ ଇସଲାମବାଦ୍ ଇଲେକ୍ଟ୍ରୋକ୍ ସପ୍ଲାଇ କମ୍ପାନୀ ପକ୍ଷରୁ ପାକିସ୍ତାନ ପ୍ରଧାନମନ୍ତ୍ରୀ ସଚିବାଳୟର ବିଜୁଳୀ କାଟିବାକୁ ନୋଟିସ୍ ଦିଆଯାଇଛି । ରିପୋର୍ଟ ଅନୁସାରେ, ପାକିସ୍ତାନ ପ୍ରଧାନମନ୍ତ୍ରୀ ସଚିବାଳୟର ବିଜୁଳୀ ବିଲ୍ ୪୧ ଲକ୍ଷ ୧୩ ହଜାର ୯୯୨ ଟଙ୍କା ବାକି ରହିଛି । ନିୟମିତ ଭାବେ ବିଜୁଳୀ ବିଲ୍ ନଭରିବାରୁ ଏତେ ଟଙ୍କା ବାକି ଥିବା ଜଣାପଡିଛି । ବହୁବାର ବିଜୁଳୀ ବିଲ୍ ନଦେବାରୁ ବିଜୁଳୀ କାଟିବାକୁ ବାଧ୍ୟ ହେବେ ବୋଲି କମ୍ପାନୀ କହିଛି ।